I.N.D.I ಮೈತ್ರಿಕೂಟಕ್ಕೆ RSS ಬೆಂಬಲ : ಏನಿದು RSS vs RSS? ಫ್ಯಾಕ್ಟ್‌ ಚೆಕ್‌ ಇಲ್ಲಿದೆ

‘ರಾಷ್ಟ್ರೀಯ ಸ್ವಯಂ ಸೇವಕ ಸಂಘ’ ಎಂಬ ಬ್ಯಾನರ್ ಅಳವಡಿಕೆ ಮಾಡಿದ್ದ ಈ ಸುದ್ದಿಗೋಷ್ಠಿಯ ಫೋಟೋ ಸಾಮಾಜಿಕ ಜಾಲತಾಣಗಳಲ್ಲಿ ಸಖತ್ ವೈರಲ್ ಆಗಿದ್ದು, ಇದರಲ್ಲಿ ಪ್ರಕಟಿಸಲಾಗಿರುವ ಮಾಹಿತಿ ಪ್ರಕಾರ ಬಿಜೆಪಿಯ ಮಾತೃ ಸಂಸ್ಥೆಯಾದ ಆರ್.ಎಸ್.ಎಸ್, 2024ರ ಲೋಕಸಭಾ ಚುನಾವಣೆ ವೇಳೆ ತನ್ನ ಬೆಂಬಲವನ್ನು ಇಂಡಿ ಮೈತ್ರಿ ಕೂಟಕ್ಕೂ ನೀಡಲಿದೆ ಎಂದು ವಿವರಿಸಲಾಗಿದೆ. ಹಾಗಾದರೆ ಇಂಡಿ ಮೈತ್ರಿಕೂಟಕ್ಕೆ ಆರ್.ಎಸ್.ಎಸ್. ಬೆಂಬಲ ಇದೆಯಾ? ಈ ಸುದ್ದಿಯ ಸತ್ಯಾಂಶವೇನು? ಬನ್ನಿ ನೋಡೋಣ..

ಸುದ್ದಿಯಲ್ಲಿ ಇರುವುದೇನು?

ಈ ವಿಡಿಯೋದಲ್ಲಿ ಮಾತನಾಡುವ ಜನಾರ್ದನ ಮೂನ್ ಎಂಬ ವ್ಯಕ್ತಿ, ಬಿಜೆಪಿಯನ್ನು ಸೋಲಿಸಲು ನಾವು ಇಂಡಿ ಮೈತ್ರಿ ಕೂಟಕ್ಕೆ ಬೆಂಬಲ ನೀಡುತ್ತಿದ್ದೇವೆ ಎಂದು ಹೇಳುತ್ತಾರೆ. ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಾದ ಫೇಸ್ ಬುಕ್ ಹಾಗೂ ಎಕ್ಸ್ (ಟ್ವಿಟ್ಟರ್) ಎರಡೂ ವೇದಿಕೆಗಳಲ್ಲಿ ಕಂಡು ಬಂದಿದ್ದು, 3 ಲಕ್ಷಕ್ಕೂ ಹೆಚ್ಚು ವೀಕ್ಷಣೆ ಹಾಗೂ 6,600ಕ್ಕೂ ಹೆಚ್ಚು ಲೈಕ್ಗಳನ್ನ ಪಡೆದಿತ್ತು.

ಆದರೆ ಇದು ಸಂಪೂರ್ಣವಾಗಿ ದಾರಿ ತಪ್ಪಿಸುವ ಸುದ್ದಿಯಾಗಿದೆ. ಏಕೆಂದರೆ ವಿಡಿಯೋದಲ್ಲಿ ಕಾಣ ಸಿಗುವ ಸಂಘಟನೆಯು ಬಿಜೆಪಿಯ ಸೈದ್ಧಾಂತಿಕ ಮಾತೃ ಸಂಸ್ಥೆಯಾದ ಆರ್.ಎಸ್.ಎಸ್ ಅಲ್ಲ. ಕೇವಲ ಹೆಸರಿಗೆ ಮಾತ್ರ ಇರುವ ಸಂಘಟನೆ ಇದು. 1925ರ ಸೆಪ್ಟೆಂಬರ್’ನಲ್ಲಿ ಡಾ. ಕೇಶವ ಬಲಿರಾಮ್ ಹೆಡ್ಗೇವಾರ್ ಸ್ಥಾಪಿಸಿದ ಆರ್.ಎಸ್.ಎಸ್ ಸಂಘಟನೆ ಇದಲ್ಲ.

ಸತ್ಯಾಂಶ ಪತ್ತೆ ಮಾಡಿದ್ದು ಹೇಗೆ?

ಈ ವಿಡಿಯೋದ ಮೇಲ್ಭಾಗದ ಬಲ ಬದಿಯ ಮೂಲೆಯಲ್ಲಿ ಆವಾಜ್ ಇಂಡಿಯಾ ಎಂದು ಬರೆಯಲಾಗಿದೆ. ಈ ಸುಳಿವನ್ನ ಆಧರಿಸಿ ಹುಡುಕಾಟ ನಡೆಸಿದಾಗ ಯೂಟ್ಯೂಬ್’ನಲ್ಲಿ ಆವಾಜ್ ಇಂಡಿಯಾ ಟಿವಿ ಎಂಬ ಚಾನಲ್ ಸಿಕ್ಕಿತು. ಈ ಚಾನಲ್’ನಲ್ಲಿ ಮಾರ್ಚ್ 24 ರಂದು ಪ್ರಕಟಿಸಲಾಗಿದ್ದ ವಿಡಿಯೋದಲ್ಲಿ ಈ ಸುದ್ದಿಗೋಷ್ಠಿಯ ಸಂಪೂರ್ಣ ವಿಡಿಯೋ ಲಭ್ಯವಾಯ್ತು.

ಯೂಟ್ಯೂಬ್’ನಲ್ಲಿ ಈ ವಿಡಿಯೋದ ಟೈಟಲ್ ಈ ರೀತಿ ಇತ್ತು. ‘ನಾಗಪುರ: ಆರ್.ಎಸ್.ಎಸ್ ಸಂಘಟನೆ ಕಾಂಗ್ರೆಸ್’ಗೆ ಬೆಂಬಲ ನೀಡಿದೆ. ಆರ್.ಎಸ್.ಎಸ್ ಮುಖ್ಯಸ್ಥ ಜನಾರ್ದನ ಮೂನ್ ಅವರ ಸುದ್ದಿಗೋಷ್ಠಿ ದೇಶಾದ್ಯಂತ ಸಂಚಲನ ಸೃಷ್ಟಿಸಿದೆ. ಈ ಸುದ್ದಿಗೋಷ್ಠಿಯಲ್ಲಿ ಅಬ್ದುಲ್ ಪಾಷಾ ಅವರೂ ಇದ್ದಾರೆ’ ಎಂದು ಬರೆಯಲಾಗಿತ್ತು. ವೈರಲ್ ಆಗಿದ್ದ ಈ ವಿಡಿಯೋ ಕ್ಲಿಪ್ನಲ್ಲಿ 0:5 ಸೆಕೆಂಡ್’ನಿಂದ ಆರಂಭ ಆಗುವ ಸುದ್ದಿಗೋಷ್ಠಿ 2:55 ನಿಮಿಷಗಳವರೆಗಿನ ವಿಡಿಯೋ ಮಾತ್ರ ವೈರಲ್ ಆಗಿತ್ತು. ಆದರೆ ಪೂರ್ಣ ವಿಡಿಯೋ ಒಟ್ಟು 12 ನಿಮಿಷಗಳ ಕಾಲ ಇದೆ. ಆದರೆ ಈ ವಿಡಿಯೋ ಇದೀಗ ಓಪನ್ ಆಗುತ್ತಿಲ್ಲ.

ಇನ್ನು ಈ ವಿಡಿಯೋ ಹಾಗೂ ಈ ಸಂಘಟನೆ ಕುರಿತಾಗಿ ಲಾಜಿಕಲ್ ಫ್ಯಾಕ್ಸ್ ಸಂಸ್ಥೆ ಇನ್ನಷ್ಟು ಸಂಶೋಧನೆ ನಡೆಸಿದಾಗ ಜನಾರ್ದನ ಮೂನ್ ಅವರ ಸಾರಥ್ಯದ ರಾಷ್ಟ್ರೀಯ ಸ್ವಯಂ ಸೇವಕ ಸಂಘಕ್ಕೂ ಆರ್.ಎಸ್.ಎಸ್ ಸಂಘಟನೆಗೂ ಯಾವುದೇ ಸಂಬಂಧ ಇಲ್ಲ ಅನ್ನೋದು ದೃಢಪಟ್ಟಿತು. ಸಂಘ ಪರಿವಾರ ಎಂದು ಕರೆಯಲಾಗುವ ಹಲವು ಬಲಪಂಥೀಯ ಸಂಘಟನೆಗಳ ಸಾರಥ್ಯವನ್ನು ಆರ್.ಎಸ್.ಎಸ್ ವಹಿಸಿದೆ. ಈ ಸಂಘಟನೆಯ ನಾಯಕತ್ವವನ್ನು ಕಳೆದ ಎರಡು ದಶಕಗಳಿಂದ ಮೋಹನ್ ಭಾಗವತ್ ಅವರು ವಹಿಸಿಕೊಂಡಿದ್ದಾರೆ.

RSS vs RSS

 

ಕೇಶವ ಬಲಿರಾಮ್ ಹೆಡ್ಗೇವಾರ್ ಆರ್.ಎಸ್.ಎಸ್ V/S ಜನಾರ್ದನ ಮೂನ್ ಆರ್.ಎಸ್.ಎಸ್ :

ಜನಾರ್ದನ ಮೂನ್ ಅವರು ರಾಷ್ಟ್ರೀಯ ಸ್ವಯಂ ಸೇವಕ ಸಂಘ (ಆರ್‌ಎಸ್ಎಸ್) ಎಂಬ ಲಾಭದ ಉದ್ದೇಶ ಇಲ್ಲದ ಸಂಘಟನೆಯೊಂದನ್ನು ನೋಂದಣಿ ಮಾಡಿಸುವ ವಿಚಾರ ಸಂಬಂಧ ಬಾಂಬೆ ಹೈಕೋರ್ಟ್‌ ಮೆಟ್ಟಿಲೇರಿದ್ದರು. ಆದರೆ, ಈ ಅರ್ಜಿಯನ್ನು ವಜಾ ಮಾಡಿದ್ದ ಬಾಂಬೆ ಹೈಕೋರ್ಟ್‌, ಈ ಹೆಸರಿನ ಸಂಘಟನೆ ಈಗಾಗಲೇ ಅಸ್ತಿತ್ವದಲ್ಲಿ ಇರುವ ಹಿನ್ನೆಲೆಯಲ್ಲಿ ಅದೇ ಹೆಸರಿನಲ್ಲಿ ಮತ್ತೊಂದು ಸಂಘಟನೆ ನೋಂದಣಿ ಮಾಡೋಕೆ ಹೇಗೆ ಸಾಧ್ಯ ಎಂದು ಪ್ರಶ್ನಿಸಿ ಅರ್ಜಿಯನ್ನು ವಜಾ ಮಾಡಿತ್ತು. ಈ ಕುರಿತಾಗಿ 2019ರ ಜನವರಿ 22 ರಂದು ಟೈಮ್ಸ್‌ ಆಫ್ ಇಂಡಿಯಾದಲ್ಲಿ ಸಮಗ್ರ ವರದಿ ಪ್ರಕಟ ಆಗಿತ್ತು.

ಆದರೆ, 2017ರಲ್ಲೇ ರಾಷ್ಟ್ರೀಯ ಸ್ವಯಂ ಸೇವಕ ಸಂಘ (ಆರ್.ಎಸ್.ಎಸ್) ಎಂಬ ಸಂಘಟನೆ ಕಟ್ಟಿಕೊಂಡಿದ್ದ ಜನಾರ್ದನ ಮೂನ್, ತಮ್ಮನ್ನು ತಾವು ಈ ಸಂಘಟನೆಯ ಅಧ್ಯಕ್ಷ ಎಂದು ಘೋಷಿಸಿಕೊಂಡಿದ್ದರು. ಈ ಸಂಘಟನೆಯನ್ನು ನೋಂದಣಿ ಮಾಡಲು ಆ’ನ್ಲೈನ್ ಮೂಲಕ ಅರ್ಜಿ ಸಲ್ಲಿಕೆ ಮಾಡಿ ವಿಫಲವಾಗಿತ್ತು. ನಾಗಪುರ ಚಾರಿಟಿ ಕಮೀಷನರ್ ಅವರು 2017ರ ಸೆಪ್ಟೆಂಬರ್’ನಲ್ಲಿ ನೋಂದಣಿ ಅರ್ಜಿ ವಜಾ ಮಾಡಿದ್ದ ಹಿನ್ನೆಲೆಯಲ್ಲಿ ಮೂನ್ ಅವರು ಹೈಕೋರ್ಟ್ ಮೆಟ್ಟಿಲೇರಿದ್ದರು.

ಅಸಲಿ ರಾಷ್ಟ್ರೀಯ ಸ್ವಯಂ ಸೇವಕ ಸಂಘವನ್ನು 1925ರಲ್ಲಿ ನಾಗಪುರದಲ್ಲಿ ಡಾ. ಕೇಶವ ಬಲಿರಾಮ್ ಹೆಡ್ಗೇವಾರ್ ಅವರು ಸ್ಥಾಪಿಸಿದ್ದರು. 2009ರಲ್ಲಿ ಈ ಸಂಘಟನೆಯ ಮುಖ್ಯಸ್ಥರಾಗಿ ಅಂದರೆ ಸರಸಂಘ ಚಾಲಕ ಹುದ್ದೆಗೆ ಮೋಹನ್ ಭಾಗವತ್ ಅವರು ನೇಮಕಗೊಂಡಿದ್ದರು. ಇನ್ನು ಎರಡೂ ಸಂಘಟನೆಗಳ ಹೆಸರು ಒಂದೇ ಆಗಿದ್ದರೂ ಕೂಡಾ ಭಾಗವತ್ ಸಾರಥ್ಯದ ಆರ್.ಎಸ್.ಎಸ್ ಹಾಗೂ ಮೂನ್ ಸಾರಥ್ಯದ ಆರ್.ಎಸ್.ಎಸ್ ಸಂಘಟನೆಗಳ ಚಿಹ್ನೆಯಲ್ಲಿ ವ್ಯತ್ಯಾಸ ಇರೋದು ಸ್ಪಷ್ಟವಾಗಿ ಗೋಚರಿಸುತ್ತದೆ.

ಇನ್ನು ಮುಂಬರುವ ಲೋಕಸಭಾ ಚುನಾವಣೆಯಲ್ಲಿ ಇಂಡಿ ಮೈತ್ರಿ ಕೂಟಕ್ಕೆ ತಮ್ಮ ಬೆಂಬಲ ವಿಸ್ತರಿಸುವ ಸಂಬಂಧ ಮೋಹನ್ ಭಾಗವತ್ ಅವರಾಗಲೀ ಅಥವಾ ಅವರ ಸಾರಥ್ಯದ ಆರ್ಎಸ್ಎಸ್ ಸಂಘಟನೆಯಾಗಲೀ ಯಾವುದೇ ಹೇಳಿಕೆ ಅಥವಾ ಪ್ರಕಟಣೆ ಹೊರಡಿಸಿಲ್ಲ.

RSS vs RSS

ನಕಲಿ ಸಂಘಟನೆ ಕುರಿತು ಬೆಳಕು ಚೆಲ್ಲಿದ ಆರ್.ಎಸ್.ಎಸ್ ಮುಖವಾಣಿ ಆರ್ಗನೈಸರ್ :

ಮೋಹನ್ ಭಾಗವತ್ ಸಾರಥ್ಯದ ಆರ್.ಎಸ್.ಎಸ್ ಸಂಘಟನೆಯ ಮುಖವಾಣಿಯಾದ ಆರ್ಗನೈಸರ್ ಈ ಕುರಿತಾಗಿ ಬೆಳಕು ಚೆಲ್ಲಿದೆ. ಮಾರ್ಚ್ 26 ರಂದು ಈ ಕುರಿತಾಗಿ ಪ್ರಕಟಣೆ ಹೊರಡಿಸಿರುವ ಆರ್ಗನೈಸರ್, ಮೂನ್ ಸಾರಥ್ಯದ ಆರ್‌ಎಸ್‌ಎಸ್ ಸಂಘಟನೆಯನ್ನು ನಕಲಿ ಆರ್‌ಎಸ್‌ಎಸ್ ಎಂದಿದೆ. ಅಷ್ಟೇ ಅಲ್ಲ, ಹೆಸರಿಗೆ ಮಾತ್ರ ಇಂಥಾದ್ದೊಂದು ಸಂಘಟನೆ ಕಟ್ಟಿಕೊಂಡಿದ್ದಾರೆ ಎಂದು ಹೇಳಿದೆ.

ಈ ಕುರಿತಾಗಿ ಹೆಚ್ಚಿನ ಮಾಹಿತಿ ಪಡೆಯಲು ಲಾಜಿಕಲಿ ಫ್ಯಾಕ್ಟ್ ಸಂಸ್ಥೆಯು ಆರ್.ಎಸ್.ಎಸ್ ನಾಯಕ ಡಾ. ಮನಮೋಹನ್ ವೈದ್ಯ ಅವರನ್ನು ಸಂಪರ್ಕಿಸಿತು. ಈ ವೇಳೆ ವೈದ್ಯ ಅವರು ಆರ್.ಎಸ್.ಎಸ್ ನ ವಕ್ತಾರ ಸುನಿಲ್ ಅಂಬೇಡ್ಕರ್ ಅವರಿಂದ ಅಧಿಕೃತ ಸ್ಪಷ್ಟನೆಯ ಹೇಳಿಕೆ ಹೊರಡಿಸಿದರು. ತಮ್ಮ ಹೇಳಿಕೆಯಲ್ಲಿ ಸುನಿಲ್ ಅಂಬೇಡ್ಕರ್ ಅವರು ನಕಲಿ ಆರ್.ಎಸ್.ಎಸ್ ನ ಮುಖ್ಯಸ್ಥ ಮೂನ್ ವಿರುದ್ದ ಆಕ್ರೋಶ ಹೊರ ಹಾಕಿದ್ದಾರೆ.

ಆತ ಈಗಲೂ ಜನರ ದಾರಿ ತಪ್ಪಿಸಲು ಯತ್ನಿಸುತ್ತಿದ್ದಾನೆ. ಆತನ ಕೃತ್ಯಗಳನ್ನು ನಾವು ಕಾನೂನಾತ್ಮಕವಾಗಿ ಪ್ರಶ್ನಿಸುತ್ತೇವೆ. ಪೊಲೀಸರಿಗೆ ದೂರು ನೀಡುತ್ತೇವೆ. ಜೊತೆಯಲ್ಲೇ ಸಾಮಾಜಿಕ ಜಾಲತಾಣ ಸಂಸ್ಥೆಗಳಿಗೆ ಈ ಕುರಿತ ಪೋಸ್ಟ್ ಹಾಗೂ ವಿಡಿಯೋಗಳನ್ನು ತೆಗೆದು ಹಾಕುವಂತೆ ಮನವಿ ಮಾಡುತ್ತೇವೆ ಎಂದು ವಿವರಿಸಿದ್ದಾರೆ.

ಇತ್ತ ಆರ್.ಎಸ್.ಎಸ್ ಅಂಗ ಸಂಸ್ಥೆ ವಿಶ್ವ ಹಿಂದೂ ಪರಿಷತ್ನ ರಾಷ್ಟ್ರೀಯ ಸಾಮಾಜಿಕ ಜಾಲತಾಣ ಹಾಗೂ ಐಟಿ ಮುಖ್ಯಸ್ಥರಾದ ರಾಕೇಶ್ ಪಾಂಡೆ ಅವರು ಆರ್.ಎಸ್.ಎಸ್ ಹೆಸರು ಇಟ್ಟುಕೊಂಡಿರುವ ನಕಲಿ ಸಂಸ್ಥೆ ವಿರುದ್ಧ ಎಕ್ಸ್ ಮೂಲಕ ಹರಿಹಾಯ್ದಿದ್ದಾರೆ. ಈಗಾಗಲೇ ಆರ್.ಎಸ್.ಎಸ್ ಎಂಬ ಹೆಸರು ಇದ್ದರೂ ಕೂಡಾ ಅದೇ ಹೆಸರಿನಲ್ಲಿ ಮತ್ತೊಂದು ಸಂಘಟನೆ ಸ್ಥಾಪಿಸುವ ಉದ್ದೇಶವಾದರೂ ಏನು ಎಂದು ಪ್ರಶ್ನಿಸಿದ್ದಾರೆ.

ಒಟ್ಟಾರೆಯಾಗಿ ಮೋಹನ್ ಭಾಗವತ್ ಸಾರಥ್ಯದ ರಾಷ್ಟ್ರೀಯ ಸ್ವಯಂ ಸೇವಕ ಸಂಘವು 2024ರ ಲೋಕಸಭಾ ಚುನಾವಣೆ ವೇಳೆ ಇಂಡಿ ಮೈತ್ರಿ ಕೂಟಕ್ಕೆ ಬೆಂಬಲ ನೀಡಿಲ್ಲ. ಆದರೆ ಅದೇ ಹೆಸರಿನ ಬೇರೆ ಸಂಘಟನೆಯ ವಿಡಿಯೋ ವೈರಲ್ ಆಗಿದೆ. ನೈಜ ಆರ್.ಎಸ್.ಎಸ್ ಸಂಘಟನೆಗೂ ನಕಲಿ ಸಂಘಟನೆಗೂ ಯಾವುದೇ ನಂಟು ಇಲ್ಲ. ಜನರಿಗೆ ದಾರಿ ತಪ್ಪಿಸುವ ಉದ್ದೇಶದಿಂದಲೇ ಈ ರೀತಿಯ ಮಾಹಿತಿ ಹರಿಬಿಡಲಾಗಿದೆ.

You might also like
Leave A Reply

Your email address will not be published.